Hóbennan di Curaçao Talent & Showbizz College a skor haltu na Hulanda
WILLEMSTAD, - - Kòrsou por ta orguyoso di su hóbennan. Banda di e echo ku Kòrsou a demonstrá un biaha mas kon grandi nos ta den deporte, arte tampoko no ta keda atras.
Siman pasa e hóbennan di Curaçao Talent & Showbizz College a bai Hulanda riba invitashon di stichting Kunstbende i teatro Luna Blou pa partisipá den un festival di arte ku a hiba di nòmber “Move Your Art”. Nan a duna tremendo presentashon djasabra i djabièrnè último na Den Bosch Hulanda.
Durante di nan estadia na Hulanda nan a traha bou di guia di diferente profeshonal di Hulanda den área di baile kanto i músika. E promé dia di presentashon kada pais a presentá nan propio show i for di e shownan aki e Direktor teatral di e show “Howard Komproe” a skohe algun segmento di kada pais i traha un show kuné. E hóbennan di Kòrsou a impakta asina tantu ku e direktor a skohe hinter nan presentashon i a hink’é den e show final ku a keda presentá djabièrnè i djasabra último. E show a hiba di nòmber
“... .. Of droom ik?
.....Of droom ik? Ta un musical ku ta konta di Frank. E soño di Frank. Den su soño Frank ta soña ku un kashi i for di e kashi aki tabata sali masha hopi hende tur tipo di hende pero tur tabata Frank i kada un tabata presentá e kosnan bon di Frank. Tur kos ta brua na momentu ku den su soño ta aparesé un Frank ku ta presentá tur e partinan negativo di dje anto einan e soño ta bira un nachtmerrie. Kòrsou a presentá den e obra aki ku baile, kanto i aktuashon. Nan a haña guia di profeshonalnan manera Patrick Mijnals(muziek en zang), Jose Klaase (aktuashon/ direktor assistente). Clarence Koorndijk i Rosano Ijzer(Dans), Luc Boons(Film). Tur a traha bou di direkshon di Howard Komproe.
E hóbennan ku a representá Kòrsou a kai bou di guia di Segni Bernardina. E hóbennan ta Sue-Ella Sambo, Sharielle Ludowika, Tsnatee Elisa, Jonette Jones, Francesca Pedro i Darhsley Nicasia. E hóbennan aki sigur sigur a kai na agrado di e dosentenan i a haña hopi kòmplimènt pa e forma serio i disiplina ku nan a traha durante di e siman ku nan tabata na Hulanda. E hóbennan a traha tur dia for di mainta nueb’or te atardi sink’or riba e produkshon. E produkshon final “...of droom ik” a keda presentá djabièrnè i djasabra den Picos studio na Den Bosch. Tur dos dia e show tabata sold out.
Aparte di a duna presentashon i a haña workshop di baile i kanto e hóbennan a haña oportunidat pa mira vários show di nivel haltu na Hulanda. Nana tabata na Hulanda hustamente na momentu ku tabata tuma lugá e Festival di teater di Den Bosch.
E show “Move Your art” tambe tabata parti di e festival i a wòrdu menshoná den korant di Den Bosch ku masha bunita palabranan: Move Your Art! Versmelt de kunsten! Tijdens de Boulevard hebben de jonge, creatieve geesten van Kunstbende(uit Belgie, Nederland, Curaçao en Aruba) Hun talenten bijeengeschoven tijdens theater- film- en dansworkshops. Kleurrijke uitwisselingen over de grenzen. Het resultaat is een verbluffende, verrassende voorstelling “Move Your Art”.