Un obra teatral di suspenso i akshon “Hudas”
WILLEMSTAD, --- Teatro Luna Blou, La Tentashon i Curaçao Talent & Showbizz College a presentá un obra teatral nobo. Dia 11 di Yüli tras di lomba tabatin premier di e obra Hudas. Hudas, un obra misterioso yen di suspenso i akshon. Fransisco ta un mionario kabes di e famia “Eskariot”, diripiente e ta wòrdu asesiná. Morto ta kuminsá kai den Famia Esakriot. Kada bes un morto ta kai niun hende no sa ta ken ta e asesino.
E úniko pista ku tin ta un papel skibi ku e nòmber Hudas i trinta moneda di plata.
.jpg)
Hudas ta skibi pa Lilimar Valencia ganador di Festival Historia Nobo.
Lilimar ta un hóben alumno di MIL Maria Imaculata Lyceum. Lilimar tin 18 aña di edat i e ta yen di kreatividat. El a skibi e obra aki ku e intenshon pa trese un kambio den e mundu teatral. Lilimar ta di opinion ku tin hopi grupo ta presentá komedia i teatro ta mas ku komedia so. Ta p’esei el a disidí di traha un obra teatral ku tin un historia di akshon i suspenso. Lilimar a skibi e historia aki pa kompetí den festival Historia nobo i el a bai ku e titulo máksimo. Komo premio Teatro Luna Blou i La Tentashon a kombertí e historia den un obra teatral nobo ku a bai den premier dia 11 di Yüli den La Tentashon.
Hudas ta un produkshon di La Tentashon, dirigí pa John Nagtegaal i produsí pa Segni Bernardina. Pa e hóben Lilimar Valencia esaki sigur ta un soño ku ta keda realisá. “Nunka mi a pensa ku lo mi por a skibi mi propio obra i ku esaki lo por a keda kombertí den un obra teatral i presentá pa públiko” asina Lilimar a bisa. E Produktor di e obra aki Segni Bernardina ta hasi un apelashon na pueblo di Kòrsou pa sostené e hóben aki i bini masalmente pa wak e obra aki paso ta esaki ta nos futuro eskritornan.
E próksimo funshonnan lo ta dia 17-18-19 i 20 di Yüli. Karchinan ta optenibel na Teatro Luna Blou pa solamente Naf.10, --
Buska bo flyer di Hudas i risibí un “welcome drink” grátis na porta.
Hudas un obra teatral di suspenso i akshon no pèrd’é.
Esaki ta un potret di Francisko Eskariot( Quincy Virginie). Milionario ku ta wòrdu asesiná den e obra “Hudas”.