Curaçao Talent & Showbizz Curaçao i La Tentashon
Oudishon pa 6 produkshon nobo di baile, kanto, i aktuashon

Willemstad, --  Curaçao Talent & Showbizz Foundation i La Tentashon a habri oportunidat pa hóbennan ku ke partisipá den tres produkshon nobo ku ta bai tin den e próksimo tres lunanan. Djasabra dia 23 pa seis’or di atardi i djadumingu dia 24 pa tres’or di atardi tabatin un oudishon pa asina skohe e diferente hóbennan ku lo bai partisipá den e próksimo produkshonnan di Curaçao Talent & Showbizz College i La Tentashon.

Den e género di teatro lo bai tin dos produkshon nobo.
“E Krusada” i “Aborto e Solushon?” Esakinan ta dos obra teatral nobo ku lo wòrdu presentá riba un anochi. Tur dos ta obranan skibi pa hóbennan yu di Kòrsou. Respektivamente Abigahiel Pinedo i Vesuhely Americaan.

E krusada ta bai over di un hóben ku ta hañ’é den vários problema pa falta di amor i guia. E problema di mas grandi ku e ta hañ’é aden ta adikshon. Tiki tiki e ta keda bai mas atras te ku e ta yega na e punto mas abou di su bida. E pregunta ta si e ta logra sali for di e abismo òf e ta kaba na nada E Krusada e punta kaminda bo mester tuma un desishon. Un obra ku hopi akshon aden. Skibi pa Abigahiel Pinedo

Aborto ta e solushon?esaki ta un obra sumamente dramátiko. Tres amiga ta Sali na estado pareu na un edat relativamente hóben. Nan niun no ta den un estado pa por kria e yunan ku denter di nuebe luna lo bini riba mundu. Nan tur tres mester buska un solushon i e pregunta ta kai. Aborto ta e solushon? Skibi pa Vesuhely Americaan.

Around the world in 90 minutes
Professor Travelalot ta inventá un mashin ku ta biaha rònt mundu den 90 minüt.
Un planta di televishon ta lot dos ticket pa dos persona por biaha rònt mundu i bai wak e loke ku nan ta interesá den dje. E pareha resien kasa Dancealot ta gana e ticket i ta skohe pa biaha rònt mundu pa nan sera konosí ku e bailenan mas eksótiko di mundu.
Durante di e musical aki lo bai tin hopi músika i baile partisipando den e proyekto aki bo ta siña balia vários baile manera Samba, Tango, Salsa i hopi mas.

La Tentashon Film Festival
Esaki ta un proyekto ku hopi hóben lo ke partisipá den dje. E ta un produkshon sumamente interesante. Durante di e produkshon aki hóben nan lo siña aktua dilanti di kámara i tambe siña traha ku kámara i editá nan propio pelíkula, dokumentario, video clip òf propaganda. E temporada di preparashon lo dura tres luna i e produkto final lo keda ekshibí den e promé “LaTentashon Film Festival”.

Dance Extravaganza
Diferente dosente di baile i koriografo ta bai traha ku un grupo di hóben pa krea diferente estilo nobo di baile.  Ehèmpel di bailenan ku a keda krea den pasado ta Hip Hop, Breakdance, Zouk, Crunk, etc... Den e kaso aki e hóbennan lo bai krea diferente baile ku lo keda presentá den e show Dance Extravaganza.

Mi ídolo. Tur hóben tin un artista ku ta nan ídolo. Esaki ta oportunidat pa kada hóben pa demonstrá kon bon nan konosé nan ídolo. Durante di un periodo di tres luna e hóbennan den e ramo di kanto lo bai wòrdu guia pa presentá un video clip di nan ídolo riba esenario. Nan lo bai haña lès di kanto i aktuashon pa asina imitá i presentá un di nan ídolo su presentashonnan dilanti. E por ta un video clip òf un presentashon life di nan ídolo. E produkshon aki ta enserá kanto, baile i aktuashon.

Kosto pa partisipá
Inskripshon i oudishon ta kosta solamente Naf. 25, -- i e ta inkluí un T-shirt. E dia di inskripshon i di oudishon ta enserá ku bo ta haña un workshop den bo disiplina, sea ta baile kanto òf aktuashon. E workshop lo tuma lugá dia 23 i 24 di ougùstùs den La Tentashon. E dia ei e dosente konserní na final ta hasi un evaluashon i mesora bo ta tende pa kua produkshon bo a keda skohe. E kostonan di partisipashon na e programa di formashon i produkshon ta Naf. 225, -- pa tres luna di formashon inkluso presentashon den e produkshon. Por paga tambe den dos paga. Si bo paga den un paga bo ta risibí un deskuento di 10%. Por yega na areglo di pago pero tambe por apliká pa un beka. Tin algun beka disponibel.

Pues hóben si bo ta entre 12 – 17 aña òf 18 pa 30 aña bo ta bon bini e fin di siman aki na La Tentashon pa partisipá den e oudishon ku lo tuma lugá djasabra seis’or di atardi i djadumingu tres’or. Djasabra lo tin oudishon pa e produkshonnan di baile i djadumingu lo tin oudishon pa e produkshonnan di aktuashon i kanto. Bin trempan pa bo ta aden pa motibu ku pa kada produkshon e kantidat di hende ta limitá.  Pa mas informashon yama: Tel:462-2872 of 462-9389. Tambe por bishita nos website na: www.curacaoshowtalents.com of e-mail nos na info@curacaoshowtalents.com  

Foto: La Tentashon

bai bèk