Obra teatral Est'un Sonjo

WILLEMSTAD,— Est’un soño ta un obra teatral kómiko diseñá pa Segni Bernardina i ta un produkshon di Curaçao Talent & Showbizz Foundation.
Despues di a hasi un oudishon dia 25 ougùstùs 2007 di baile kanto i aktuashon, tabatin algun hóben ku a sobresalí. 

E hóbennan aki a hasi oudishon pa por partisipá na Curaçao Talent & Showbizz College, ku ta un skol di baile kanto i aktuashon. Grandi tabata nan sorpresa ku despues di nan oudishon ya tabatin un proyekto ta wardanan.
Tabata  Kas di Kultura ku a aserka Segni Bernardina pa krea un obra pa siman di kultura.

Segni a aseptá e tarea aki mesora i huntu ku e team di CTSF a disidí di diseñá un obra i a skohe Ellon Donker i John Nagtegaal pa dirigí e obra.
E dos direktoranan aki a sinta huntu i a yega na e idea pa laga e hóbennan mes krea e obra. Esaki a resultá un éksito rotundo. E hóbennan a traha un obra ku tin komo mensahe den dje pa bai pa bo soño maske kuantu opstákulo bo hañabo kuné den bo kaminda.
E hóbennan a krea i prepará nan mes pa e obra den dos siman di tempu ku entrenamentu serio i disiplina tur dia dos ora largu.

Un pabien ta bai na e hóbennan aki. Nan a demonstrá ku nan tin talento i gana pa logra hasi nan soño bira realidat.

Piscadera -WTC,—Elenko di Es’tun soño. Forma pa hóben nan kreativo i positivo. Nan mes a hinka e obra den otro bou di guia di John Nagtegaal i Ellon Donker. Esaki ta un foto di e obra durante di siman di Kultura na WTC.