Festival Historia nobo
La Tentashon ta duna bo chèns pa traha bo mes obra teatral

Festival “Un historia nobo” ta un proyekto di La Tentashon.
E Festival Historia Nobo ta duna  bo oportunidat pa bai den kashi i saka kualke historia ku bo a yega di skibi, òf si bo tin un historia pa un pelíkula, obra teatral, komedia, buki etc... ku bo ta kana kuné den bo kabes pero nunka bo no a skibié, awèl esaki ta e oportunidat pa bo kibra e eis.
La Tentashon ta duna bo e oportunidat pa bo desaroyá bo talento di skibi i alabes kompetí den un festival pa “Un historia Nobo” di kual e premio grandi ta ku La Tentashon lo bai produsí e obra huntu ku bo.

Toke diferente
E aña aki tin un toke diferente na e Festival Historia Nobo.
Den kuadro di selebrashon di promé lustro di Teatro Luna Blou na aña 2008, e tema di e selebrashon lo bai ta “Soñonan ku ta bira realidat”. Pa e motibu ei nos ta pidi partisipantenan pa di un forma kreativo hinka den nan historia algu ku tin di haber ku soño, soña òf un soño.  Pa motibu ku e obra ganadó lo wòrdu presentá durante di e selebrashon di promé lustro di teatro Luna Blou.

Kon pa partisipá?
Partisipá na e Festival Historia Nobo ta fásil.
Bo ta skibi un sinopsis di bo historia riba maksimal dos A4. (Lettertype Arial 10)
Trata di den korto deskribí tur loke bo historia ta kontené di un forma impaktante.
Bo ta manda bo Historia nobo na:
Roodeweg 153 A. Skibi riba e ènvelòp  Festival Historia Nobo.
Bo por manda bo historia tambe via mail na:  info@curacaoshowtalents.com    
Huntu ku bo historia identifiká bo mes mas amplio posibel ku un CV.
E historia mester wòrdu entrega di tik i ku lèternan komprendibel.
E historia mester wòrdu entrega promé ku dia 30 di sèptèmber 2007.

Proseso
Kada historia lo wòrdu evaluá dor di un team di personanan eksperensia den e área aki.
E historianan ku impreshoná i ku pasa e screening lo partisipá den e festival “Un Historia Nobo. Tur e eskritornan ku wòrdu skohe durante di un Luna lo haña un kurso.
E kurso ta enserá:

1. Prepará bo historia pa un Dramatical Reading.(Konta bo historia pa públiko di un forma dramatisá)
2. Siña kon pa skibi un script
3. Kombertí bo Historia den un Script pa un obra teatral.
4. Produkshon di un obra teatral.

E kulminashon di e festival ta fin di Òktober. Pa mas informashon yama na Telefon: 462-9389 durante oranan di ofisina òf yama Segni Bernardina na telefon 670-4313.