Curaçao Talent & Showbizz Foundation a presentá Youth Valentine’s Dinner Show pa solamente Naf. 15, --

WILLEMSTAD, -- Djaweps tras di lomba tabata dia di San Valentino i Curaçao Talent & Showbizz Foundation a organisá un Valentine Dinner spesialmente pa hóben den La Tentashon.

E idea tras di e Valentines Dinner aki tabata pa hóbennan bin topa otro den un ambiente di amistat i interkambiá ku otro kiko berdaderamente ta amor. Pa por guia hinter e diskushon aki Curaçao Talent & Showbizz Foundation a invitá Sr. Nelson Scoop pa asina duna un charla kiko ta e berdadero nifikashon di amor i dia di San Valentino. Hopi biaha nos ta kere ku dia di San Valentino ta solamente pa namoradonan. Pero e ta mas ku esei.

E Valentines Dinner aki a tuma lugá dia 14 di Febrüari den La Tentashon di shet’or pa nueb’or di anochi. Aparte di e charla di sr. Nelson Scoop, tabatin presentashon di kanto, baile i aktuashon di e hóbennan di Curaçao Talent & Showbizz College i tambe hopi premio. Kada sekshon di Curaçao Talent & Showbizz College a prepará algu ku tin di haber ku dia di San Valentino pa presentá. E tabata un anochi hopi spesial. La Tentashon a keda kombertí den un sala di amor spesialmente pa nos hóbennan.

Un danki special ta bai na, Curaçao Beverage Bottling Company i Fria, Firgos, J & G Nieuwehuizen i Nestea, Pietersz Import, TDS, Diamonds, Kortijn ijs, Alves Supermarket i The Profesional Unique Barbershop pa nan kooperashon.